ഐ.പി.എല്ലിനായി യു.എ.യിലെത്തിയ ചെന്നൈ സൂപ്പര്‍ കിങ്സിന്‍െറ ഫാസ്റ്റ് ബൗളര്‍ക്കും പത്തോളം സ്റ്റാഫ് അംഗങ്ങള്‍ക്കും കോവിഡ് സ്ഥിരീകരിച്ചു. ആഗസ്റ്റ് 21നാണ് ധോണിയുടെ നേതൃത്വത്തിലെ ടീം ഇന്ത്യയില്‍നിന്ന് വിമാനം കയറിയത്. ആസ്ട്രേലിയന്‍ താരമായ ഷെയ്ന്‍ വാട്സണ്‍ അടക്കമുള്ളവരും യു.എ.ഇയിലെത്തിയിരുന്നു.
തുടര്‍ന്ന് ടീം അംഗങ്ങള്‍ ഹോട്ടല്‍ റൂമുകളില്‍ ക്വാറന്‍റീനില്‍ കഴിയുകയായിരുന്നു. ഇതിനിടയിലെ പരിശോധനയിലാണ് ടീമിനെ ആശങ്കയിലാഴ്ത്തി താരത്തിനും ജീവനക്കാര്‍ക്കും വെള്ളിയാഴ്ച കോവിഡ് സ്ഥിരീകരിച്ചത്. ഇതോടെ ടീമിന്‍െറ ക്വാറന്റീന് സെപ്റ്റംബര്‍ ഒന്നുവരെ നീട്ടി. കോവിഡ് സ്ഥിരീകരിച്ച ബൗളര്‍ ഇന്ത്യന്‍ ടീമിന് വേണ്ടി കളിച്ചിട്ടുണ്ടെന്ന് എ.എന്‍.ഐ റിപ്പോര്‍ട്ട് ചെയ്തു.ദുബൈയിലേക്ക് തിരിക്കുന്നതിന് മുമ്ബ് ചെന്നൈയില്‍ ടീമിന് പരിശീലനമുണ്ടായിരുന്നു. അടുത്ത ദിവസം വീണ്ടും ടീം അംഗങ്ങള്‍ക്ക് പരിശോധന നടത്തുമെന്നാണ് വിവരം.
സെപ്റ്റംബര്‍ 19നാണ് ടൂര്‍ണമെന്‍റ് തുടങ്ങുക. നിലവിലെ ചാമ്ബ്യന്‍മാരായ മുംബൈ ഇന്ത്യന്‍സും ചെന്നൈയും തമ്മിലാണ് ആദ്യ മത്സരം.
ഇന്ത്യയില്‍ കോവിഡ് പടര്‍ന്നുപിടിക്കുന്ന സാഹചര്യത്തിലാണ് മത്സരങ്ങള്‍ യു.എ.ഇയിലേക്ക് മാറ്റിയത്. ദുബൈ, ഷാര്‍ജ, അബൂദബി എന്നിവിടങ്ങളിലെ ഗ്രൗണ്ടുകളിലായിരുക്കും മത്സരങ്ങള്‍ നടക്കുക. അതേസമയം, ഇന്ത്യന്‍ ക്യാപ്റ്റര്‍ കോഹ്ലിയുടെ നേതൃത്വത്തിലുള്ള ബാംഗ്ലൂര്‍ ടീം അംഗങ്ങള്‍ വെള്ളിയാഴ്ച ക്വാറന്റീന് പൂര്‍ത്തിയാക്കി പരിശീലനം തുടങ്ങിയ ചിത്രങ്ങള്‍ അധികൃതര്‍ പുറത്തുവിട്ടിട്ടുണ്ട്.
Post a Comment